∑காந்தி(எதிர்)யம் = ∫{∑f(பார்ப்பன-பனியம், ஜாதிய-ஜட்டியம், அரைவேக்காட்டியம்)}dவெறுப்பியம்

11/05/2012

அட என்னடா இது, டர்புர்ரென்று oddஐக் கடித்து modஐக் கடித்து இப்போது தொகையீட்டு நுண்கணிதம் (நம்ம integral calculus தான் அய்யா, இது! ) பக்கமும் வந்து விட்டான் என்று ஒரு மாதிரியாகப் பார்க்காதீர்கள். எல்லாம் உங்கள் பழவினைப் பயன் தான், வேறென்ன சொல்ல!

… சமயத்தில் எனக்கு வரும் சில மின்னஞ்சல்கள் (நல்ல வேளை, எனக்கு இம்மாதிரி நிறைய வருவதில்லை) என்னை இப்படிப் பாடாகப் படுத்தி விடுகின்றன; மன்னிக்கவும்.

முன்னர் இப்படிப் பதிவான கேள்வி(!) – பதில்கள்(!!) – தொடர்புடைய பதிவுகள்:

=-=-=-=-=

9. காந்தி ஒரு மூன்றாந்தர வக்கீல் – சர்ச்சில் அப்படித்தான் சொன்னதாக படித்திருக்கிறேன். அம்பேட்கரும் அப்படித்தான் சொன்னார். அவரா மாதாந்திரம் ஆயிரக் கணக்கில், அதுவும் நூறு ஆண்டுகளுக்கு முன்னம் பெரும்பணம்  சம்பாதித்திருக்க முடியும்? தற்காலத்தில் இது சில கோடிகளுக்குச் சமம்! மன்னிக்கவும், கொஞ்சம் மிகையாகத்தான் இருக்கிறது உங்கள் பஜனை. ஏதோ திமுகவை எதிர்த்து எழுதினீர்கள் என உங்கள் இணைய தளத்தைப் படிக்க ஆரம்பித்தேன். ஆனால் வருந்தத்தக்க விதத்தில், திமுக எதிர்ப்பைத் தளர்த்தி, இப்போது பார்ப்பன-பனியா, தரகு முதலாளிய ஜால்ராவைத் தொடங்கியிருக்கிறீர்கள்! திராவிட விடுத்லை இயக்கங்களுக்கு மாற்றாக இருப்பது காந்தியம் தான் என்று நீங்கள்  கருதினால் அதனைத் தவறு என்று சுட்டிக் காட்ட வேண்டியது மிக்க அவசியம். தொடர்ந்து காந்தியப் பிரச்சாரம் எழுதினால், இடதுசாரி இயக்கங்களை கிண்டல் செய்து எழுதினால், நான் உங்கள் தளத்தை இனி படிக்கப் போவதில்லை.

அய்யா, நன்றி.

எனக்குக் கூட நீங்கள் யாரென்று எனக்குத் தெரியாது. அப்படியானால், நீங்கள், மின்னஞ்சல் அனுப்பத் தெரிந்த ஒரு யானையாகக் கூட இருக்கக் கூடுமன்றோ? ஆக நீங்கள் இறந்தாலும் ஆயிரம் பொன் அல்லவா? ஆக உங்களை நான் கொன்று, ஆலுக்காஸ் நகைக்கடைக் காளான்களிடம் கொடுத்து – செய்கூலியும் சேதாரமும் இல்லாமல் – கூட அழகுணர்ச்சியும் சுத்தமாக அற்ற நகைகள் பெற்று மினுக்கிக் கொண்டு பவனி வரலாமன்றோ? ஆக, நான் ஒரு அருவருக்கத்தக்க பூர்ஷ்வா அன்றோ? ஆக, நீங்கள் யானை என்றால், நான் ஒரு பூர்ஷ்வா.

ஆமென்!

இப்படித்தான் போகிறது அய்யா, உங்கள் குதர்க்கவாதமும், போலிஅறிவியல்வாத நிரூபணமும் – ஒன்றுக்கொன்று சுத்தமாகத் தொடர்பே இல்லாமல், அதர்க்கப் பாய்ச்சல்களும், மேலோட்டமான நுனிப்புல் மேய்தல்களும், சிரத்தை என்கிற ஊர்ப்பக்கம் நீங்கள் மழை, வெய்யிலுக்குக் கூட ஒதுங்கமாட்டீர்கள் போல…

தரவுகள் என்பவை முக்கியமானவை. ஆனால் பொத்தாம்பொதுவாக உளறிக்கொட்டுவது தான், நம்முடைய உரையாடல்களுக்கு, உங்கள் உச்சகட்டப் பங்களிப்பு என்பது மிகுந்த ஆயாசம் தருகிறது.

சரி பரவாயில்லை – உங்கள் எதிர்வினை – ’காந்தி எனும் வழக்குரைஞர்’  தொடர்பாக இரண்டு மாதங்கள் முன்வந்தது. பதில்(!) இவ்வளவு தாமதமாக எழுதுவற்கு மன்னிக்கவும்.

இப்போது உங்கள் கேள்விகளை ஒவ்வொன்றாகப் பார்க்கலாமா?

காந்தி ஒரு மூன்றாந்தர வக்கீல் – சர்ச்சில் அப்படித்தான் சொன்னதாக படித்திருக்கிறேன். அம்பேட்கரும் அப்படித்தான் சொன்னார்.

சர்ச்சில் இளக்காரமாக, காந்தி படித்த ‘இன்னர் டெம்ப்ல்’ கல்லூரியைச் சம்பந்தப்படுத்தி –  இம்மாதிரி, இப்படிச் சொன்னார்தான். ஆனால், எனக்குத் தெரிந்தவரை அம்பேட்கர் அப்படிச் சொன்னதாக நினைவில்லை. நீங்கள் எங்கு அப்படிப் படித்திருக்கிறீர்கள் என்று சொல்ல முடியுமா? எந்தச் சூழலில் அப்படிச் சொல்லியிருக்கக் கூடும் என்பது தான் தெரியுமா?

தேவையில்லாமல் பொய் நெல்லிக்காய் மூட்டைகளைத் திறந்து, அவிழ்த்துக் கொட்டி,  நெல்லிகள் உருண்டோடும்போது அவற்றில் பின் அலைந்து அல்லாட வேண்டாம்.

அவரா மாதாந்திரம் ஆயிரக் கணக்கில், அதுவும் நூறு ஆண்டுகளுக்கு முன்னம் பெரும்பணம்  சம்பாதித்திருக்க முடியும்? தற்காலத்தில் இது சில கோடிகளுக்குச் சமம்! மன்னிக்கவும், கொஞ்சம் மிகையாகத்தான் இருக்கிறது உங்கள் பஜனை. 

காந்தி  தென் ஆஃப்ரிகாவில் பணி செய்துகொண்டிருந்தவரை, மிக அபரிமிதமாகப் பணம் ஈட்டினார் – ஆனால், அதற்காக அவர் எந்தத் தகிடு தத்தமும் செய்யவில்லை. மேலும் அவர் சொந்த-சொற்ப உபயோகத்துக்கு மேல்  தன் சம்பாத்தியத்தை அவர் தன் நண்பர்களுக்காகவும், பண்ணைகளுக்காகவும், ஏழை இந்தியர்களுக்காகவும், கருப்பர்களுக்காகவும், பண்ணை சார் தொழில்களுக்காகவும் செலவழித்தார்.  மெய்யாலுமே ‘ நெஞ்சில் நேர்மை, பணிவு, சுய அர்ப்பணிப்பு, பொது வாழ்வில் தூய்மை, மகாமகோன்னதக் கருத்துகளாலும் கரங்களினாலும் மிகக் கடின உழைப்பு’ போன்றவற்றைத் தொடர்ந்து  செய்தார், கடைப்பிடித்தார்.

மேலும் அவர் எடுத்துக் கொண்ட எந்த விஷயத்திலும, உன்னதத்தை நோக்கிப் பயணம் செய்பவராகவே இருந்தார்.

ஏதோ திமுகவை எதிர்த்து எழுதினீர்கள் என உங்கள் இணைய தளத்தைப் படிக்க ஆரம்பித்தேன்.

அய்யா, நான் ஒரு வருடமுன்னால் இவ்வலைப்பூ தொடங்கியது திமுக எதிர்ப்புக்காக மட்டுமே. உண்மைதான். அச்சமயம் என்னளவில் அது முக்கியமானது என நினைத்தேன். எழுதமட்டும் செய்யவில்லை நான் – என்னால் முடிந்தவரை, சிறிது களப்பணியும்(!) செய்தேன். தமிழக வாக்காளர் எண்ணிக்கையில் இது ஒரு பொருட்படுத்தத் தக்க விஷயமே இல்லை என்றாலும்… என் சொந்த முயற்சியால் சுமார் 12200 – 12500 வாக்குகள், திமுகவிற்கு எதிராகப் பதிவாகி இருக்கும் (கடந்த 2011 ஏப்ரல் தேர்தல்களில்) என நினைக்கிறேன்; ஹ்ம்ம்ம், ஒரு வருடம் பின் இது பற்றி யோசிக்கும் போது இப்புள்ளியியல் (!) விவரத்தில் 99% பிறழ்ச்சி/தவறு இருக்கக் கூடிய வாய்ப்புக்கள் அதிகமென்று தான் நினைக்கிறேன். :-)

ஆனால் நான் அந்தப் புத்த பிக்கு சொன்னதைப் போல, அந்தப் பெண்ணை அந்த ஆற்றங்கரையிலேயே இறக்கி விட்டு விட்டேன். மன்னிக்கவும். (சில சமயம் அந்தப் பெண்ணை நினைப்பதை என்னால் தவிர்க்க முடியவில்லை என்றாலும்… அய்யா,  எப்படி நான் என் தானைத் தலைவரை மறக்க முடியும்?)

ஆனால் வருந்தத்தக்க விதத்தில், திமுக எதிர்ப்பைத் தளர்த்தி, இப்போது பார்ப்பன-பனியா, தரகு முதலாளிய ஜால்ராவைத் தொடங்கியிருக்கிறீர்கள்!

மிகவும் அயர்வாக இருக்கிறது, இம்மாதிரிப் படு பயங்கர, நடுநடுக்கும், கிடுகிடுக்கும் சதித்திட்டங்களைப் பற்றி, மறுபடியும், மறுபடியும் கேள்விப்படுவதற்கு…  ஆனால் சிறிது யோசிக்கிறேன்.

பார்ப்பன Bania – என்பது ஒரு அரதப்பழசான அ–சுமுகவியல்சார் (ஏனெனில், இந்த வகைப் பதங்களில், சுமுக சமரச உணர்ச்சியற்று மக்களைப் பிரித்தாளும் நோக்கமே பிரதானம்) வன்கலைச்சொல் என்பதை நாம் அறிவோம், ஆக நாம் இன்னமும் மேல் நோக்கிப் பயணம் செய்து, சமூக-மானுடவியலையும் அதன் லக்கணங்களையும் பின் நவீனத்துவக் கட்டுடைப்புச் செய்து பரிணாமரீதியில் பல்பரிமாணங்களை அடைய, எட்ட வேண்டியிருக்கிறது அல்லவா? (லொக், லொக் ஹ்ம்ம்…)

அய்யா, நீஙகள் இன்னமும் பார்ப்பன பனியா பற்றித்தான் பேசிக் கொண்டிருக்கிறீர்களா? ஏன் banianகளுக்கு மட்டும் இவ்வளவு காலமாக திராவிடாத இயக்கச் சோடைமேடைப்பேச்சாடல்களில் முன்னுரிமை தந்து கொண்டிருக்கிறோம்? இவ்வயிற்றுப் போக்குக்கு மாற்றாக ஏன் நீங்களாவது மற்ற ‘ஜாதிய ஜட்டி’ இத்தியாதிகள் பக்கமும் அருள் பாலிக்கக் கூடாது?

நாமணியும் துணிமணிகளும், நாமறியும் ஜாதிக்களும் நமதென்பதறிவதற்கு நமக்கு இன்னும் எவ்வளவு காலம்தான் அவகாசம் வேண்டும்?

அவைகளும் நம் சதித் திட்டங்களில் பங்கு பெற வேண்டாமா? அவற்றுக்கும் நாம் சமூகநீதிசார் இடஒதுக்கீடு செய்வதல்லவா  நியாயம்?

எடுத்துக் காட்டாக, உங்களைப் போன்றவர்கள் கையாள்வதற்குப் பற்பல பாடு(படுத்தும்) பொருட்கள் உள்ளனவே!  (ஒரு)மாதிரிக்கு, தற்போதைக்கு உங்களுக்கு உதவட்டுமே என்று… (சில ஆங்கில முழிபெயர்ப்புகளுடன்)

  • தேவர தாங்கா (thong)
  • நாயர நிக்கரா (அ) நூட்ல்ஸ் டாப்பா (knicker, noodles top)
  • அருந்ததிய அரைஞாணா
  • கோனார கோட்டா (அ) கோனார கோமணா (coat)
  • வன்னிய வெஸ்டா (vest)
  • துளுக்க துண்டா (அ) துளுக்க துப்பட்டா (duppatta)
  • வேளாள வேட்டியா
  • சோழிய சுடிதாரா (chudithar)
  • கவுண்ட கவுனா (gown)
  • கைக்கோளக் கைக்குட்டையா (அ) கால்சராயா
  • முதலியார முண்டாசா
  • வைசிய வேட்டியா
  • தலித  தோதியா (dhoti)
  • படுக பன்டானா (bandana)
  • ரெட்டிய ரெடிமேடா
  • ஜாதிய ஜாக்கெட்டா

அய்யா, நீங்கள் ஏன் மேற்போன்றவற்றையும் எடுத்தாளக் கூடாது? எவ்வளவு இருக்கின்றன இம்மாதிரி? என்ன பாவம் செய்தன இவை? ஏ நிந்தப் பாராமுகம் அய்யா, உங்களுக்கு…

பந்திக்கு முந்தும் தமிழ் மந்திகளல்லவா நாம்? வேகமைய்யா, வேகம் – மற்றவர்களுக்கு முன்னால், நாம் ஓஓஓஓடிப்போய் வெற்றுவாகை சூடவேண்டுமைய்யா….

(கிட்டே வாருங்கள் – உங்களது எண்ணப் போக்கு, சில சமயம், நீங்கள் திருப்பூர் பனியன்கடைக்காரரோ என்கிற சந்தேகத்தை என்னுள் எழுப்புகிறது – நீங்கள் பனியா பனியா எனப் புலம்புவது ஏன்?? என்ன,  நான் நினைப்பது சரியா?)

=-=-=-=

தரகு முதலாளி என்பவன் யார்? நன்றாக யோசியுங்கள். நாம் எல்லோரும்தான், பல விதங்களில், பல வேளைகளில். நாம் வாழ்ந்து கொண்டிருக்கும் காலகட்டத்தில், எதற்குமே தரகுகள் முக்கியம், ( நீங்கள் மிகச் சரியாகவே புரிந்து கொண்டிருப்பது போல) தரவுகள் நிச்சயம் அல்ல.

ஒருக்கால், விறகு முதலாளி ‘தொட்டி’ வைத்திருப்பதால், நீங்கள் ஏடாகூடமாக – தரகு முதலாளி ‘வட்டி’ கேட்பார் – என்கிற ரீதியில் இவ்விஷயத்தைப் புரிந்து (!) கொண்டிருக்கிறீர்களா? அநியாய வட்டி கறாராகக் கறக்கப் படுவதினால் அது கறந்தவட்டியாகி, பின் அது மருவி கந்து வட்டியாகி  விட்ட கந்தரகோளக் கதையினால் குழம்பி விட்டீர்களா?

ஏன் இப்படி வெறும் தகர டப்பி வார்த்தைகளை மந்திர உச்சாடனம் செய்கிறீர்கள்?

என்னைக் கேட்டால்,  நீங்கள் ஒரு ’முன்னோடி’ வரகு-முதலாளியாகி – நமது பாரம்பரியப் பொக்கிஷங்களான  சிறு தானியங்களை – வளமை,செழுமை முன்னோங்க – பரப்பித் தொண்டு செய்தால்தான் உங்களுக்கு விமோசனம்.

அய்யா – உண்மையில் எனக்கு, அந்தக் கால ’விக்டோரிய’ உபாத்தியாயர்கள் போல, உங்கள் காதை நன்றாகத் திருகி, உங்களுக்கு வாழ்க்கை பற்றிய அரிச்சுவடிப் பாடம் நடத்தவேண்டுமெனத் தோன்றுகிறது. Lend me your ear, please!

திராவிட விடுதலை இயக்கங்களுக்கு மாற்றாக இருப்பது காந்தியம் தான் என்று நீங்கள் கருதினால் அதனைத் தவறு என்று சுட்டிக் காட்ட வேண்டியது மிக்க அவசியம். .

அய்யா, நான் அப்படிச் சொல்லவில்லை. மேலும் திராவிட ’இயக்கம்’ என்று ஒன்று இருப்பதாகவே (அல்லது இருந்ததாகவே) நான் கருதுவதில்லை.

ஏனெனில் திராவிடம் (’தமிழ்’) என்பது ஒரு இயக்கமாகக் கருதப் பட முடியாது. ஆனால், அது நமது கலாச்சாரத்தின் ஒரு அங்கம் என்பதை நிச்சயம் ஒப்புக் கொள்ளலாம்.

வெறும் உணர்ச்சிக் குவியல்களால், பேச்சுப் பந்தல்களால், புனைவுசார் அடித்தளங்களின்மீது எழுப்பப்பட்ட பொய்க்கட்டுமானங்களால், மக்களின் முட்டாள்தனத்தைப் பயன்படுத்தி – அரசியல் சந்தர்ப்பவாதிகளால் சுற்றி வளைக்கப்பட்ட மக்கள் திரள், நிச்சயம் ஒரு மக்கள் இயக்கமாகாது.; சமூக/மானுடவியல் சார்ந்து இந்த அவலநிலைப் புரிதல் பற்றி, ஒரு புத்தகமே எழுதலாம்.

தவிர, ‘விடுதலை’க்கும் (அது எம்மாதிரி விடுதலையாக இருந்தாலும் சரி) திராவிடம் சம்பந்தப் பட்ட கூட்டங்களுக்கும் என்ன தொடர்பு என்று நீங்கள் தெளிவு செய்ய வேண்டும். எனது (சில சமயம்) மொட்டைத்தலைக்கும், முழங்காலுக்கும் முடிச்சுப் போட வேண்டாம்.

நீங்கள் உங்கள் மின்னஞ்சலில் திராவிட ‘இயக்கங்களை’ ஒரு காலத்தில் மதித்ததாகக் குறிப்பிட்டுள்ளீர்கள். பரவாயில்லை. நான் உங்களை எப்படியும் மன்னித்து விடுகிறேன்.

ஆனால், இடதுசாரித் தீவிரவாதப் பேயோட்டுதல்களிடமிருந்தும் நீங்கள் வெளிவர என் பிரார்த்தனைகள்.

தொடர்ந்து காந்தியப் பிரச்சாரம் எழுதினால், இடதுசாரி இயக்கங்களை கிண்டல் செய்து எழுதினால், நான் உங்கள் தளத்தை இனி படிக்கப் போவதில்லை

தேவரீர் தயை செய்து அப்படிச் சொல்லக் கூடாது. எனது வலைப்பூவைப் படிக்கும் ஒரே இரண்டாம் மனிதர் நீங்கள் தாம் என்பதால் நான் மிகவும் துக்கித்துப் போயிருக்கிறேன். என்னை நானே திருத்தி கொள்வதற்கு, எனக்கு, தயாள குணம் படைத்த நீங்கள் இன்னொரு வாய்ப்பைத் தயவு செய்து அளிப்பீர்களா??

ஆனால் அய்யா, உண்மையைச் சொல்லப் போனால், நீங்கள் படிப்பதற்காக நான் எழுதவில்லை. மாறாக, நானே படித்து, நானே புளகாங்கிதம் அடைவதற்காகத்தான் எழுதுகிறேன்.  நான் உலகெங்கும் (=விழுப்புரம் மாவட்டம்) பயணம் செய்யக் கூடியவன். ஆக போகும் இடத்திலெல்லாம், என்னுடைய எழுத்தை நானே படித்து, காதலுற்றுக் கசிந்துருகி, பக்திப் பரவசமடைவதற்காகத்தான் இணையத்தில் பதிவு செய்கிறேன். இதனை நீங்கள் வலைப்பூச்சுயமைதுனம் என்று கூடக் கருதலாம். ஆக, நீங்கள் பேஷாக இனி என் எழுத்துக்களைப் படிக்க வேண்டாம்.

அய்யா, நான் பிரச்சாரம் செய்வதற்காக எழுதவில்லை. என்னுடைய சொந்த அனுபவங்களை, புரிதல்களை(!), ஆஹாக்களை, ஆசைகளை, வருத்தங்களைத்தான் எழுதுகிறேன். இன்னொன்று, இந்தக் கட்டுரைகள் என் எண்ணங்களை என் மட்டில் கோர்வைப்(!) படுத்துகின்றன – நான் இன்னமும்(!) தெளிவாகச்(!!) சிந்தனை செய்வதற்கு, என்னுடைய அண்டவெளியைக் கட்டமைப்பதற்கு உதவுகின்றன. அவ்வளவே.

ஆக எனக்கு இடது, வலது, மேல், கீழ், சாரி சுடிதார் பற்றியெல்லாம் அபார ஈடுபாடோ, அல்லது திராவிட ‘இயக்க’ங்களுக்கு மாற்றாக இன்னொரு எறும்பு சாரியை முற்படுத்துவதோ, தற்போதைக்கு முடியாது.

நீங்கள் கூடிய சீக்கிரம் வளர, பொலிய, என் வாழ்த்துக்கள், பிரார்த்தனைகள்.

காந்தியாயணம்…

Advertisements

2 Responses to “∑காந்தி(எதிர்)யம் = ∫{∑f(பார்ப்பன-பனியம், ஜாதிய-ஜட்டியம், அரைவேக்காட்டியம்)}dவெறுப்பியம்”

  1. வடக்குபட்டி ராமசாமி Says:

    உங்கள் வார்த்தை ஜாலமும் இடை இடையே ஆங்கில கதைகளை இணைப்பாக கொடுப்பதும் மிக்க ஆச்சர்யத்தை ஏற்படுத்துகிறது.வாழ்த்துக்கள் உங்கள் நையாண்டி நடைக்கு

  2. Sakthivelu K Says:

    நீதிக்கு, சமநீதிக்குக் குரல் கொடுப்பவர்கள் ஏன் குறிப்பிட்ட புது சாதியை உருவாக்கி தீமைகளுக்கு வழி கோல வேண்டும்? இன்றைய தேவை, “Poverty reduction”. அறிவு ஜீவிகள அரற்றுவது புரியவில்லை. உண்மையான சுதந்திரம் எது என்பதை காந்தியடிகள் நன்குணர்ந்துள்ளார்.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: